Froeks docht Serious Request!
Oankommende moandei is it safier! Dan set Froeks.TV útein mei de aksje foar Serious Request fan radiostjoerder 3FM. Froeks.TV sil foar it goeie doel 48 oeren lang live útstjoere fanôf de redaksje yn'e Blokhúspoarte yn Ljouwert.
Twa dagen lang sille de presintatoren harren ynsette om jild yn te sammeljen foar de aksje fan 3FM, dy't dit jier yn it teken stiet fan “moeders in de oorlog”. Fansels is der in wiidweidich programma opset dat 48 oeren troch rint, dêrneist lûke de kameraminsken en ferslachjouwers Fryslân yn om eltsenien fan de aksjes op'e hichte te bringen en jild yn te sammeljen foar memmen yn oarlochsgebieden. Sa kin eltsenien bygelyks in krystboadskip opnimme foar freonen of famylje, dizze wurdt letter dan útstjoert op de livestream. Dêrneast hawwe ferskate bedriuwen út de regio priizen beskikber stelt dy't te winnen binne, sa binne der kaarten foar theaterfoarstellings en muzykoptredens, wellness-pakketten en oare items.
It episinitrum fan de aksje is it stekje fan Froeks.TV yn de Blokhúspoarte yn Ljouwert. Fanút de redaksje, dy't foar de gelegenheid ombouwt is ta tillevyzjestudio, sille de fêste presintatoren fan Froeks.TV harren sjows presinteare. Sa begjinne we de dei sportyf mei moarnsgymnastyk en dernei geane we oan'e kofje yn Ricardo. Oerdei komt der fanalles oer de flier, wêrûnder DJ's, bands, en gasten mei ynteressante ferhalen. Ek yn de nacht giet de útstjoering gewoan troch, sa kin Ricardo dyn takomst foarspelle troch nei de stjerren te sjen en kinst letter yn'e nacht advys freegje foar tusken de lekkens. Tusken de programma's troch hâlde we jim op'e hichte fan it nijs út de provinsje, de tuskenstân fan de opbringsten en de ferskate aksjes. Ek wurde de hichtepunten fan trije jier Froeks.TV wer fan souder helle en kinne jim nei de soap “De Alde Fabryk” en de spylfim “Fuort” sjen.
Alles is fansels live te sjen op de stream, mar oerdei binne de doarren fan de Blokhúspoarte ek iepen! Kom dus efkes del om in bod te dwaan op in item, yn bydrage te leverjen oan it goeie doel, of om gewoan efkes by de redaksje te sjen!
Fanôf oankommende moandei 12 oere middeis oant woansdei 12 oere fia http://www.ustream.tv/channel/froeks-tv
